नेकपा (एमाले) काठमाडौं जिल्ला कमिटीले गृहमन्त्रीलाई काठमाडौं जिल्लामा राष्ट्रिय परिचयपत्र अनिवार्य गर्ने मिति पछि सार्न आग्रह गरेको छ। बुधबार नेकपा (एमाले)का नेता कृष्णगोपाल श्रेष्ठसहित काठमाडौं जिल्ला कमिटीका नेताहरुले गृहमन्त्री रवि लामिछानेलाई भेटेर यो आग्रह गरेका हुन्।
सरकारले सार्वजनिक सेवा प्राप्त गर्न राष्ट्रिय परिचयपत्र अनिवार्य गरेसँगै, काठमाडौं लगायत २८ जिल्लामा आगामी साउन १ गतेदेखि यसको प्रयोग अनिवार्य गरिएको छ। वृद्ध भत्ता लगायत सामाजिक सुरक्षा भत्ता लिन पनि राष्ट्रिय परिचयपत्र अनिवार्य गरिएकाले, समयमै परिचयपत्र नबनाएका नागरिकको भत्ता नरोक्न नेताहरुले माग गरेका छन्।
काठमाडौंका स्थानीय तहमा सीमित स्रोत र साधन रहेकोले, समयमै सबैलाई परिचयपत्र उपलब्ध गराउन नसकिने भन्दै, मिति पुनःविचार गर्न गृहमन्त्रीलाई आग्रह गरिएको नेता कृष्णगोपाल श्रेष्ठले बताएका छन्। उनले आवश्यकता परेमा समय थप गर्न आग्रह गरेको र गृहमन्त्रीले यसलाई सकारात्मक रुपमा लिएको जानकारी दिएका छन्।
श्रेष्ठले राष्ट्रिय परिचयपत्र प्रभावकारी र सहज रुपमा जनताले प्राप्त गर्नुपर्ने भन्दै गृह मन्त्रालयले आवश्यक सहजीकरण गर्नुपर्ने कुरा पनि बताएका छन्।
