सौर्यको जहाज यसकारण लगिँदै थियो पोखरा

के उडाउन अयोग्य थियो सौर्यको जहाज?

आज बिहान सौर्य एयरलाइन्सको जहाज काठमाडौंबाट मर्मतका लागि पोखरा जाने क्रममा त्रिभुवन अन्तर्राष्ट्रिय विमानस्थलमा दुर्घटनाग्रस्त भयो। उक्त दुर्घटनामा १५ जनाले ज्यान गुमाएका छन्, जसमध्ये अधिकांश एयरलाइन्सकै कर्मचारी हुन्।

एयरलाइन्सले जहाजको इन्जिन मर्मतका लागि पोखरा लैजान लागेको जनाएको छ। त्रिभुवन विमानस्थलमा मर्मत नगरेर पोखरा लैजानुको कारणबारे प्रवक्ता सुवाष झाले भने, “काठमाडौंको त्रिभुवन विमानस्थलमा ठाउँ सानो छ र सौर्य एयरलाइन्सको आफ्नै ह्याङ्गर पनि छैन। पोखरामा ठूलो ठाउँ र खाली पनि छ, त्यसैले पोखरा लैजान खोजिएको थियो।” उनले थपे कि विमानस्थललाई जहाजले तिर्ने शुल्क काठमाडौं र पोखरामा खासै फरक छैन।

जहाजमा अधिकांश एयरलाइन्सका कर्मचारी थिए। एयरलाइन्सको उच्च तहका ४ जनाले ज्यान गुमाएका छन् भने अन्य प्राविधिक तथा इन्जिनियरहरु पनि परेका छन्। कति एयरलाइन्सका कर्मचारी थिए र कति सर्वसाधारण थिए भन्ने चाहिँ खुलेको छैन।