काठमाडौं। राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेलाई पार्टी कार्यालयबाट प्रहरीले पक्राउ गरी पोखरातिर लगेको छ। रास्वपाका नेता र कार्यकर्ताहरूको ठूलो समूह प्रहरीले चढेको गाडीलाई पछ्याउँदै पोखरातर्फ लागेका छन्।
रास्वपाका उपसभापति डीपी अर्याल र स्वर्णिम वाग्ले पनि पोखरा जाँदैछन्। स्वर्णिम वाग्ले पहिले नै प्रस्थान गरिसकेको बुझिएको छ। रास्वपाका धेरैजसो पदाधिकारीहरू प्रहरीको गाडी पछिपछि हिँडेका छन्।
रविकी पत्नी निकिता पौडेल पनि पोखरा जाँदैछिन्। उनी आफ्नै गाडीमा सवार भएर हिँडेकी हुन्।
रास्वपाको युवा दस्ता (र्यापिड एक्सन टीम) पनि रविलाई समर्थन जनाउन पोखरा जाने तयारीमा छ। यसका लागि गाडीहरूको व्यवस्थापन भइरहेको जानकारी प्राप्त भएको छ।
रवि लामिछानेले अघिल्लो सरकार ढाल्ने सहमति भएको दिन नै आफूलाई पक्राउ गर्ने सम्झौता भएको दाबी गरेका छन्। पार्टी कार्यालयबाट पक्राउ पर्नुअघि कार्यकर्ताहरूलाई सम्बोधन गर्दै पूर्वगृहमन्त्रीसमेत रहेका लामिछानेले यस्तो बताएका हुन्।
‘म सरकारको बाध्यता बुझ्छु। मलाई थाहा छ– जुन दिन सरकार ढाल्ने निर्णय भएको थियो, त्यसै दिन रविलाई जसरी भए पनि जेल हाल्छौँ, चिन्ता नगर्नुस् भन्ने सम्झौता उहाँहरूले गर्नुभएको सूचना मलाई छ,’ उनले भने।
व्यक्तिगत रूपमा आफूले धेरै कुरा पाइसकेकाले पक्राउ पर्नुमा कुनै चिन्ता नभएको बताउँदै उनले सरकार टिकाउनकै लागि मात्र सम्झौता नगरेको दाबी गरे। उनले थपे, ‘आम नेपाली नागरिकले सबै कुरा देखेकै छन्, बुझेकै छन्। म यति एउटा कुराचाहिँ भन्न चाहन्छु, यदि उनीहरूले जस्तै सम्झौता गरेको भए सायद सरकार लम्बिन्थ्यो होला। हामीले यो अप्ठ्यारो सामना गर्नुपर्ने थिएन। तर, हामीले कुनै पनि सम्झौता गरेनौँ।’
भिडियो 👇
