७ साउन २०८१, काठमाडौं। प्रधानमन्त्री केपी शर्मा ओलीले सोमबारको मन्त्रिपरिषद् बैठकमा विदेश भ्रमणसम्बन्धी तीनवटा निर्देशन दिएका छन्:
१. सकेसम्म विदेश भ्रमण नगर्ने: फटाफट काम गर्नुपर्ने समय भएकोले मन्त्री, सचिव लगायत उच्च पदस्थ अधिकारीहरूले सकेसम्म विदेश भ्रमण नगर्ने।
२. भ्रमण अवधि छोट्याउने: यदि विदेश भ्रमण गर्नै परेमा, भ्रमणको अवधि छोट्याउनुपर्ने।
३. भ्रमण दलमा महिला अनिवार्य: कुनै पनि विदेश भ्रमण दलमा महिला कर्मचारी वा प्रतिनिधि अनिवार्य रूपमा समावेश गर्नुपर्ने।
एक मन्त्रीले भने, ‘भ्रमण मण्डलमा दुई जनामात्रै भए पनि कम्तीमा एक महिला अनिवार्य हुनैपर्ने निर्णय भएको छ। तर, रातदिन खटेर काम गर्नुपर्ने बेला भएको भन्दै प्रधानमन्त्रीले सकेसम्म भ्रमण नै नगर्न निर्देशन दिनुभएको छ।’
यसअघि, कतिपय मन्त्रीहरू लामो समयसम्म विदेश भ्रमणमा रहने र पदमुक्त हुँदा विदेशमै रहने दृष्टान्तहरू देखिएपछि प्रधानमन्त्रीले काम देखाउने प्रतिस्पर्धामा खरो उत्रन निर्देशन दिएका थिए।
सोमबारको मन्त्रिपरिषद् बैठकले उद्योग वाणिज्य तथा आपूर्तिमन्त्री दामोदर भण्डारी र युवा तथा खेलकुदमन्त्री तेजुलाल चौधरीको विदेश भ्रमण स्वीकृत गरेको छ। उद्योगमन्त्री भण्डारी विमस्टेक बैठकमा र खेलकुदमन्त्री चौधरी ओलम्पिक खेल समारोहका लागि फ्रान्स जान लागेका हुन्।
