काठमाडौं, धनुषा हिरासतमा रहेका कान्तिपुर मिडिया ग्रुपका अध्यक्ष कैलाश सिरोहियाले नागरिकता अभियोगमा अदालतमा आफ्नो बयानबारे जानकारी गराउँदै प्रष्टीकरण सार्वजनिक गरेका छन्।
सिरोहियाले आफूले नागरिकता प्रचलित कानुनअनुसार राज्यको निकायबाट प्राप्त गरेको बताए। उनले हालको विवाद गृहमन्त्री तथा रास्वपा सभापति रवि लामिछानेका शृंखलाबद्ध गल्तीहरुबारे लेखिएका रिपोर्टिङविरुद्धको प्रतिशोध रहेको दाबी गरेका छन्।
मंगलबार काठमाडौंस्थित कान्तिपुरको कार्यकक्षबाट गिरफ्तार भएका सिरोहियाले बुधबार धनुषा अदालतमा बयान दिएका थिए। उनका कानुन व्यवसायीहरु रमन कर्ण र किशोर पौडेलले बिहीबार जनकपुरमा प्रष्टीकरण सार्वजनिक गरेका हुन्।
उनीहरुले यो विवादको पछाडि सिरोहियाको नागरिकता नभई, कान्तिपुर लगायत मिडियाले सहकारी ठगी प्रकरणमा गृहमन्त्रीको संलग्नता उजागर गरेपछि आएको प्रतिक्रिया रहेको बताए।
