काठमाडाैं – पृथ्वीको तापक्रमलाई १.५ डिग्री सेल्सियसभन्दा माथि जानबाट रोक्नका लागि सबैको संयुक्त प्रयास आवश्यक रहेको विज्ञहरूले बताएका छन्। बुधबारदेखि काठमाडौंमा सुरु भएको हिमाल, जनता, र जलवायु सम्बन्धी अन्तर्राष्ट्रिय सम्मेलनमा विज्ञहरूले कार्बन उत्सर्जनलाई घटाएर तापक्रमलाई नियन्त्रणमा राख्न जोड दिएका हुन्।
दुई दिनसम्म चल्ने यो सम्मेलनको पहिलो दिनको पहिलो सत्रमा पृथ्वीको तापक्रमलाई १.५ डिग्री सेल्सियसमा सीमित राख्न आवश्यक प्रयासहरूको बारेमा छलफल भयो। जलवायु विज्ञ मञ्जित ढकालले विभिन्न राष्ट्रहरू बीच सहकार्य र समन्वयको वातावरण कसरी बनाउन सकिन्छ भन्ने विषयमा पनि छलफल भएको बताए।
सुत्र टिभीसँग कुरा गर्दै जलवायु विज्ञ ढकालले जलवायु परिवर्तनको मुद्दा केवल पर्वतीय देशहरूको मात्र नभई सम्पूर्ण विश्वको मुद्दा भएकाले यो विषयलाई विश्वव्यापी बनाउने आवश्यकता रहेको बताए। विभिन्न देशहरू बीचको सहकार्यबाट मात्र कार्बन उत्सर्जन घटाउन सकिने उनले बताए। जलवायु परिवर्तनको असर पर्वतीय क्षेत्रहरूमा मात्र नभई हिउँ पग्लिएर समुद्रमा पुगेपछि तल्लो तटीय भूभागमा पर्ने असरलाई पनि ध्यान दिनुपर्नेमा छलफल केन्द्रित भएको उनले बताए।
पहिलो दिनको अन्तिम सत्रमा जलवायु परिवर्तनका कारण उत्पन्न संकटहरूको बारेमा छलफल भयो। राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले हिमाली राष्ट्रहरूले जलवायु परिवर्तनका कारण भोगेको नोक्सानीको क्षतिपूर्ति छिटो प्राप्त गर्नुपर्नेमा जोड दिए। सम्मेलन बिहीवारसम्म चल्नेछ।
